Vawiin (Nov. 10, 2026) atang hian ni thum chhung awh tur Synod Executive Committee vawi 321-na chu J.M. Lloyd Hall, Synod Office-ah an thu tan a, November 12, 2026 (Ningani) thleng a awh ang.
Thut khawm hi Rev. John Raldosanga, Synod Moderator-in a kaihruai a, Rev. B. Zohmangaiha, Synod Secretary-in report a pe a, Rev. Dr. K. Lallawmzuala, Finance Officer-in report a pe bawk.
Report-ah hian State Institute of Rural Development & Panchayati Raj (SIDR&PR) leh Mission Development Training Centre (MDTC) ten MoU an ziah thu te, Masihi Sangati Convention vawi 34-na tluang taka neih a nih thu te, SMB leh MFA thawh hona chungchang te, ram pum huapa Ruihhlo Do kawng zawh neih a nih thu te, Jordan Centre, Sethawn hawn a nih thu te, Synod Hospital leh John Williams Hospital thawh hona chungchang te, ram pum huap Kohhran Pavalai Pawl intawhkhawm neih a nih thu te, Council of Churches in Mizoram (CCM) Inkhawmpui lian vawi 2-na neih a nih thu te leh MUHCS inremna ziah thar leh a nih thu te tarlan a ni.
Tun tumah hian India rama sakhaw zalenna a awm theih nana hmalak chungchang te, Kohhran Pavalai Pawl Fellowship Inkaihhruaina chungchang te, Synod Press kalpui zel dan tur te, Bharat Susamchar Samiti/New Theological College, Dehradun nena thawh hona tih thar leh chungchang te, Union of Evangelical Students of India nena thawh hona chungchang te, Mizoram Christian University din rawtna chungchang te, ATC Campus Master Plan siam thar leh rawtna te, Synod hnuaia Building hrang hrang sak tur ruahmanna chungchang te, Phnom Penh (Cambodia)-a Building lei chungchang te, Pathian Biak Inkhawm Hruaina Bu en that chungchang te leh Sairang Railway Station-a Chaplain dah rawtna te chu a langsar zualte an ni.