Chanchin Tha Luka ziak bung 4:1-13 kan en chuan he khawvela rawng a bawl tan tirh dawn lai vela Setanan thlemna hrang hranga a thlem thu leh Lal Isuan a hneh vek thu kan hmu. Heng thute hi ka tet deuh lai chuan thawnthu hriatin ka hria a, ka chhiar pawhin ka chhiar liam ve mai thin. Mahse Pathian khawngaihna zarah ngun lehzuala ka han zir chian chuan tunlaia ringtu zawng zawngte tana tul leh pawimawh tak zirtirna nei a lo ni reng mai. Chungte chu a mal malin i lo chhui teh ang.
1. Lung chhanga chantir thu (Lk. 4:3&4) : Lung chhanga chantir tura thlemna hi Lal Isua thlemna hmasa ber a ni. Isua kha ni 40 leh zan 40 chaw pawh ei lovin thlalerah thlarau hruaiin a awm a. Mihring tak a nihna a lo lang chhuak a, a ril a lo tam ta a. Thlalera lung kha an hun lai chhang ang deuh ‘var deuh vo’ a ni an ti. Lal Isua kha engkimtithei Pathian a ni bawk. Lung chhanga chantir kha thil harsa a ni miah lo. Mahse Pathian remruatna tidik tur chuan a mihrinna a lantir a ngai tlat. Chuvangin Lal Isua nuna pawimawh ber Lalpa remruatna chu nunna a nihzia a tar lang. ‘Mihring hi chhang chauhvin an nung lo vang’ tiin a hneh ta. Tunlai ringtu tam takte hian he thlemna hi kan va do zo lo em! Sawrkar hnathawktu atanga Kohhrana hna sang thawk mek te, sumdawng leh eizawnna hrang hrang hnathawkte hian kan nunna tur dik tak hre lovin khawvlelah hian kan theihna hmangin thil kan va tidanglamin kan tamna hrang hrang kan va han phuhruk nasa si em! Lal Isua zirtir, a hnehna hmanrua mihringten kan mamawh ber ‘Lalpa kamchhuak leh remruatna’ rin ngam ve a va tul tak em! Unau, nang lung chhangah i la chantir zel dawn em ni?
2. Khawvel ram zawng zawng entir (Lk. 4:5-8) : Lal Isuan thlemna pahnihna a tawh chu khawvel ram zawng zawng lan theihna atanga ena Setana chibai buka khawvel neih vek a ni. Khawvel leh a ropuina leh thuneihna Diabola chibai buk zauhva neih mai chu a va awlsam hmel em! Hei bakah hian hausakna te, nawmchennate khawvel thil engkim hi a tel vek ka ring. Nimahsela Lal Isua hnehna leh a chhanna chu, “Lalpa i Pathian chauh chibai buk la, ama rawng chauh bawl rawh,” tih a ni. Leilung pian tirh ata Beramno talh tawh – Pathian Chatuana remruatna atang chuan he thlemna hi inhmuhsitna nasa tak a va han ni teh lul em! Thisen chhuak lova khawvel han neih vek mai chu a va remchan hmel em! A va awlsam si em! Mahse Diabola ruahmannaa mihringte a hmangaih em em chhandam hi Pathian thil tum a ni miah lo. Ringtuten he thlemna leh hnehna atang hian zir tur pawimawh tak kan nei. Khawvel hausakna leh nawmchennate a mawina te hian tunlai ringtute min va hip nasa em! Ropuina leh lalna te, thuneihnate kan chan theihna turin Diabola ruahmanna anga a awlsam zawnga neih theih dan tur kan va han hre nasa ta em! Han tih zeuha neih theih a nih dawn chuan pawisak pawh kan nei tawh lo a nih hi. Khawvel hi hmangaih lo tur leh a chhunga thil awmte pawh hmangaih lo turin kan Bible chuan min hrilh a ni. Mahse ringtute hian kan nep phal hlawl lo zawng a nih hi. Piangthar tawh tam tak pawh kan pil bo leh mek a ni. Hnim hling nei zinga buh chi tla kha damchhung khawsak lungkhamna te, hausakna te leh nawmsaknaten a dip a, rah chhuah lovin an awm ta a nih kha (Lk. 8:14). Ringtu rah chhuah lova awm mekte hi Diabola thang, a thlemnaah kan ^wk a ni ngei ang. Lal Isuan thlemna a hnehna tawngkam ‘Lalpa Pathian chauh chibai buk a, a rawng chauh bawl’ tih a va ngai ta em! Lal Isuan hneh dan a thiam a nia, i tawmpui ve ang u.
3. Biak In chhip atanga tlak (Lk. 4:9-12) : Lal Isua thlemna pathumna chu Biak In chhipzum atanga tla thla tura tih a ni. Lal Isua chu Pathian ram din tura he leia lo kal a ni a. Biak In chhipzum atang khan tla thlain na hauh lovin awm ta se, Pathian Fapa a nihzia fiahna tha tak a ni ang a, miin an zui nghal dual mai awm e. Mahse Pathian ram chu thilmak hmanga din tur a ni lo va, Pathian fiahna a nih dawn avang leh chhinchhiahna hmanga din a nih dawn avangin Lal Isuan a duh lo va, Pathian thil tum a ni bawk hek lo.
Tunlai Kristiante pawh hian thilmak kan zawng nasa a, kan ngaisang a, kan bawr nasa thei hle mai. Hman kum lawka Mualpuia Vantirhkoh thla tukverh puanzara lang an tih kan han pan nasat dante han chhut khan thilmak kan zawn nasatzia a lang hle awm e. Bible-in Pathian thu a sawi leh a tar lan hi Pathian ram dinna leh a ringtute tana thlarau lam nunna hn^r tha ber a ni a. Chumi ring lova a mak leh a dangdai ringawt zawn leh um hi Pathian duh dan a ni lo tih hriat tur a ni. Pathian thutak hriatna tur chu kan Bible thu hi a ni a, a bak thil dang beisei hi kan Lalpa remtih zawng a ni lo. Chuvangin a ni kan Lal Isua pawh khan a duh hauh loh ni.
Tunlaia kan rawngbawlnaah pawh hian mi tih aia danglam leh dangdai zawnna a tam em em. Rawngbawltu leh mipuite pawhin kan zawng a, kan bawh nasa thei hle mai. Pathianin a pek zawng an awm ngei mai. Mahse a pek lem loh pawhin kan zawng nasa ta lutuk erawh hi chu kan tih tur a ni hauh lovang. Chutiang thlemna lakah chuan i inveng ang u.
Lal Isua thlemna hnehna hmanruate hi tunlai atan, nang leh keia tan vawiin ni thlengin a la tha a, tawngtai leh dil chungin tihtakzeta Lalpa chakna ring chunga kan hneh theih nan thlemna tinreng tawk tawh sual si lo hneh zeltua hi i bel chawt mai ang u. Lalpan mal min sawmsak theuh rawh se.