Kan Kohhranah kumin hian thil lian tham tak tak a thleng a, chung thil bik chauh chu han tarlang ila :
(1) Revival Centenary kan lawm a, kan hlim hle. PCI Assembly-ah kan lawm zui a, kan hlim lehzual. Pathian Thlarau Thianghlimin kan Kohhran hi a kaihruai tak meuh a ni tih a lang chiang.
(2) Politik siamthat nan “Synod-in tun aia nasa zawkin hma la rawh se” (Synod 2004, Gen. 11) chu bawhzui a ni a, thu maia siamthat chi a nih loh avangin MPF din a ni ta. Mipuiin MPF-ah hian beiseina sang tak an nei a, a lawmawm hle. Tlungvel Constituency by-election-a MPF hnathawh hian chu chu a lanchian tir hle a ni. Kohhran pawldang leh Tlawmngai pawlte nena inzar zawma thawh a ngaih avangin MPF hi din a ni a, kan Kohhran hian neitu ber nihna a chang lo thei lo. Hmuntinah MPF Local Forum din a ngai a, kan rawngbawltuten neitu chan lo chan hle a ngai zui dawn.
(3) Kumin hian Presbytery 12 hawn thar a ni a, Pastor Bial thar 12 hawn belh a ni bawk. Presbytery 27 ni thin kha tunah hian 36 kan lo ni ta. Hei hi kan Kohhran chanchina thil chhinchhiah tlak a ni.
(4) Kum kalta khan kan Budget pumpui kha cheng nuai 597-in kum a han tawp tak tak chuan kan khum thei a, a lawmawm hle, kan Kohhran mite zawng zawng hnenah lawmthu ka sawi duh a ni.
(5) Kan Hospital OPD Extension-cum-Casualty atan Millenium Centre chungah kum 91 chhung luah theih tur room cheng nuai 57-in lei a ni bawk. Mipuiin zing leh tlai karah pawh kan doctor-te an inentir theih nana buatsaih a ni dawn a, kan hospital hmasawn nan pawh a tha hle tura ngaih a ni.
(6) Manipur-a kan Vaiphei unaute inkara buaina awm, buaithlak tak kha inremna tha tak leh lungawi thlak tak neiin kan Synod-ah an rawn lut nghet thei dawn ta bawk. Hei pawh hi a ropui hle. Heng thil paruk chauh pawh hian kan Kohhran hi Pathianin min duhsak a ni tih a lanchian tir hle a ni.
Kan thupui turah cheng tan dawn tawh ila. “In zinga Pathian pawlho awm chu enkawl rawh u” tih hi New King James Version chuan, “Shepherd the flock of God which is among you” tiin a dah. ‘Shepherd’ tih chu ‘enkawltu’ tihna a ni a, ‘chawm’ tihna pawh a ni tho. Kan Kohhran enkawl dan hian bihchian a mamawhin ka hria. “Kohhran Enkawlna” (Pastoralia) Rev. Saiaithanga ziak kha tunhma khan kan tangkaipui em em thin. Kha kha Synod Standing Committee-in kan Kohhran enkawl nan a pawmpui niin ka hria. Kan chhawr em em a, kan lentlak pawh a rual tha thin. Khatianga principle leh tum dan tha min petu kha a awm ta lova, kalhmang, tumdan leh thawh danah tlakchham a awm ta niin a lang. I ngaihtuah chiang ang u. Zanina ka sawi duhte chu a indawtin kan tarlang ang e.
1. Thu-a inchawmna :
Kan Kohhran mite hian rawngbawltu thlarau mi, thusawi thiam leh inpe zo an duh ber. “Thlarau mi” tih hian a kawh ber chu ‘Diabola hmun kian ngai lo’ tih hi a ni. Miten “Isua hnenah an awm tawh” an tih thin ang kha. Tawngkam thiam ni ringawt lo, awihawm taka thu tak hriattirtu hi thusawi thiam ka tih chu a ni. “Thu chu kan sawi thei theuh” tih ngawt tur a ni lo. Kohhran enkawl zo tur leh humhalh zo turin thua inchawmna hi kan kalpui a ngai a ni. Rawngbawltu thusawi chu Biak Inah a ni emaw, Mitthi Vuinaah a ni emaw, Inneih Inkhawmah pawh ni sela, awmze nei leh miten an ngaihthlak kham loh khawpa ngaihnawm a nih chuan Kohhran a him a, a mite an tlai thin. Pawldang mite hip thintu ber pawh hei hi a ni. Pathian thu hriatna tha, thlarauva tah hriam hi Paula’n ‘Thlarau Ngunhnam’ a tih kha a ni a, Kohhran chawmna leh enkawlna atan Kohhranin a mamawh ber a ni hial dawn lo’m ni? Thlarau Ngunhnam vawng hriam thei lo tur chuan nemngheh rawngbawl hna hi thawh ve kher tum loh mai âwm a ni.
Peter kha a thlarau ngunhnam tuai a fuh harna chhan ber chu ‘Pathian thil ngaihtuah lova, mihring thil a ngaihtuah zawk’ fo vang a ni. Vana a lawn dawn thlengin Isuan “Mi zui rawh.” “Nangin mi zui mai rawh” tiin a nawr tih kan hria. Pentikos Ni hnuah erawh a Thlarau Ngunhnam a hriam tha hle. A nun khan Thlarau lam hnute tui engmah pawlh loh a châk a, chutiang ngei chuan Beramte a enkawl ta a nih kha. Duhamna leh itsikna, politik tuinu lutukte hi chu i chak lul lovang u, kan Kohhran chawmna a chawhpawlh tur a ni lo.
2. Pathian thu anga châk chunga thawh tur :
Pathian thu zir tur laknaah, “Pathianin a koh dan che min han hrilh teh” tia Board memberte zawhna chhang mumal thei lo an tam thei hle. “Ka tet laiin ka nuin min hlan” tihte, “Ka tum ber leh chak ber a ni” tihte hi an chhanna tam ber a ni. Rawngbawltu nihna nge an chak, rawngbawlna tih hi hriatthiam a har thin. Peteran ‘Pathian thu anga châk’ a tih hian “tihtur a nih vang ni lovin” a tih tel avangin official duty anga thawh tur a ni lo a tihna a ni. Rawngbawlna Report Form fill-up tha thiam tak, mahse “A term hi a zawh hun chuan, tha deuh min rawn ngaihtuah sak ve tawh dawn nia” tia Synod hotute an bekbawr thin hian rilru a tihrehawm duh hle. I inenfiah ang u. Rawngbawltu thenkhat chu kan official lutukin a lang; kan hmel thleng thleng hian a official deuh âl âwm asin. Kohhranho zing tawngtainaa tel ngai lo, official duty leh report tur hre tak, mite thlarau man lem si lo a awm theih hle a ni awm e.
Rawngbawl hna hi Pathian thu anga châk tur a ni a, mahni châk châka lo châk ve ngawt chi pawh a ni lo. Châk zawk dang lo neih tel tur a ni hek lo. Miten rawngbawl hna aia châk zawk leh tuipui zawk neia min hriat chuan Pathian pawlho chu kan enkawl tha hauh lovang. Chhun leh zana i tulpui ber chu Pathian thu leh a rawngbawl hna a ni tur a ni. Missionary lak thar 15-ten Board hmaa an zawhna chhan dan leh an thil sawi dan kha a ropui hle. Mittui a ko chhuak lek lek hlawm a, an lak a nuam a, a hahdam; an official ve lo.
3. Serhhran rilrua thawh tur a ni :
‘Serhhran’ tih leh ‘tihhran’ tih hi a inang reng. ‘Hriak thih’ tih nen pawh a inanna lai a awm. Thianghlimna atana thil hlan a kawk a, Pathian tihthianghlimna leh a pawmtlak sawina a keng bawk. Chuvangin “mite tih dan” tih hi kan intehna atan a tlak ve vek lo. Thinlung lamah leh pawn lam nunah ramri kham fel tak neih tur a ni. “Pastor chuan dan zawhkim tih theih ang zawng zawng a ti thei ve a ni” Pastor Saiaithangan a tih pawh kha he ramri chhungah hian a ni. Thilsual leh mawi lo, inthununna tur em ni chiah si lo thleng hian a ti ve thiang a tihna a ni lo. Kohhran hnatlangah a thawk ve tur a ni a, chhiatni thatniah leh rualpawlna chi dang dangah a bang bik tur a ni lo a tihna zawk a ni.
Petera’n ‘a hniaka zui’ a tih ang leh Paula’n ‘mi zawng zawng thisenah ka hul a ni’ a tihna rilru hmang hian rawngbawltuten Pathian pawlho i enkawl ang u.
Lalpa’n kan za atan malsawm rawh se. Amen.