Synod Social Front chuan a vawikhatna atana pipe fit thiam (plumber) training a buatsaih chu nizan (Dec. 15, 2015) khan Pi Zaii Hall, Synod Conference Centre-ah a kharna neih a ni.
Training kharna hun hi Upa H. Ronghaka, Synod Secretary-in a kaihruai a, Upa H. Lalhmingmawia, Social Front Coordinator-in report pe-in plumber training an buatsaih chhan a sawi a. Mizote hi kut themthiam hnam, la hriat ngai loh thil pawh a thiamin an tilai en a thiam ve thei nghal mai zel kan ni a. Pipe fit thiamte pawh kan ramin kan mamawh em em a, kan thalai hna neilo te tan eizawnna siam sak zelna a lo nih bawk avangin Synod Social Front chuan hetiang hian training hi a buatsaih a. Mithiam an lo pun zel hian ram leh khawtlang tan mi tangkai an pung zel dawn a ni tih ringin training-a telte chu mi hman tlak leh chhawr nuam, a ruaitute tana rawih manhla ni ngei se an duh thu a sawi.
Synod Moderator Rev. H. Lalrinmawian fuihna thu sawiin zirlai chhuakte hnenah Certificate leh Pipe thread siamna (Pipe Threader) a hlan a. ‘Eng hna pawh thawk ila, lungawi taka rinawmna leh tumruhna nen, taima takin ruihhlo laka fihlim chunga tih a pawimawh’ tiin zirchhuakte a chah a. Nl. Sarah Lalngaihawmin Pathian fakna hla vawi hnih a sa bawk.
Synod Secretary Upa H. Ronghaka chuan ‘Khawvel ram changkang apiangah kut hnathawk thiam bikte chu an ding chhuak ngei thin a, kan ram hmasawn chak takah pawh hian thiamna nei bikte dinhmun a tha zel dawn a ni,’ a ti a. Hemi hun atana sawm bik Upa C. Lallunghnema, Superintending Engineer, PHE chuan trainee-te hriatna tizau thei thil pawimawh leh fuihna thuchah ngaihnawm tak a sawi bawk.
Plumber training-ah hian trainee 13 an awm a, December 1 - 14, 2015 chhung khan Zosaphluia Building kawtah training hi neih thin a ni a, hmun dangah practical neiin an chhuak thin bawk. Training chhung hian hmanrua leh bungruate bakah chhun lama ei leh inte Synod Social Front hian a buaipui vek a ni.