Rev. Chawnghmingliana, Zamuang Bialtu Pastor chu nizan (Dec. 24, 2015) dar 6:10 khan Synod Hospital-ah Rectum Cancer avangin a thi a, vawiin (dec. 25, 2015) chawhnu dar 1:00 hian Republic Vengthlang Kohhran Biak In-ah Synod Moderator Rev. H. Lalrinmawian a vui ang.
Pian leh murna
Rev. Chawnghmingliana hi Upa K. Darthanga leh Lalnunziri te fa pali (Mipa 3 leh hmeichhe 1) zinga a upa ber dawttu niin October ni 26, 1982-ah Aizawl Civil Hospital-ah a piang. An unau a upat dan indawtin -
1. Vanlalhruaii
2. Rev. Chawnghmingliana h/o Pi Varthanpuii Varte
3. Lalengzuala
4. Lalremruata
Kum 2012 March ni 22-ah Serchhip Vengchung Pro. Pastor a nih laiin Varthanpuii Varte D/o Varthanchhunga (L) Khatla nen an innei a, fa pakhat - Lalmuanhlua Khawlhring (kum 2) an nei. Rev.Chawnghmingliana hi naupang thu awih thei tak leh tleirawl sual pawh nei lo a ni a, nu leh pa rilru tihnat ai chuan mahni programme neih sa pawh thulh mai thin mi a ni. Amah hi mi inuluk leh mi chengvawng, thil ti mai mai lo mi a ni.
Zirna lam
Kum 2004-ah Aizawl College atangin B.A a zo va, kum 2009-ah Aizawl Theological College atangin B.D. a zo leh.
Rawngbawlna lam
Kum 2009 Synod Inkhawmpui Mission Vengthlang Biak Ina neih chuan Pro. Pastor atan a la a, kum 2010 - 2011 chhungin Bungtlang ‘S’-ah Pro. Pastor-in a awm a, hetah hian Bial Secretary a ni. Kum 2012-ah Serchhip Vengchung-ah Pro. Pastor-in a awm leh a, kum 2012 Synod Inkhawmpui Chanmari Kohhran Biak In-a neih chuan Pastor atan a nemnghet. Kum 2013 atangin Zamuang Pastor Bial a vawng a, a hriselna that tawk loh avangin kum 2015 Synod Inkhawmpui chuan kum 2016 atanga Synod Office-a awm turin a rel ta a ni.
A nat dan tlangpui
December 27, 2014 chhuna Zamuang Kohhran Committee an neih laiin bleeding a nei tan a, tlai lamah mahnia motor la inkhalh peihin Kawrthah Hospital-ah an inentir a, nikhaw hre lovin a awm zui a, ni 29.12.2015-ah Synod Hospital, Durtlangah phurh thlen a ni. Ni 8.1.2015-ah Rectum Cancer a ni tih hriat chhuah a ni a, CMC, Vellore-ah refer nghal a ni a, ni 16.1.2015-ah Christian Medical College, Vellore-ah admit nghal a ni. Ni 31.1.2015-ah Chemotheraphy a la tan a, vawi kua a lak hnuah ni 19.5.2015 atangin Radiation therapy a la tan leh a, vawi 30 lai a la a ni. Ni 24.8.2015-ah zai turin Operation Theatre-ah lak luh a ni naa, a pum tuamtu rang (Peritoneum)-ah Cancer a lo kai tawh avangin an zai thei ta lo va, hetiang a nih tak avang hian ni 4.9.2015-ah Aizawl-ah an lo haw chho ta a ni. Ni 6.10.2015-ah a puma tui awm vawi thum siak a nih hnuah Grace Hospital-ah admit a ni a. Ni 20.10.2015-ah chhuak lehin a dam that theih loh avangin ni 5.11.2015-ah Synod Hospital, Durtlangah admit leh a ni. A na a zual tak em avangin ni 17.11.2015 tlaiah ICU-ah dah luh a ni a, ni thum chhung a awm hnuin damdawi in atangin in lama inenkawl turin a chhuak ta a ni.
A hun hnuhnung
Thisen pek ngai hiala a awm tak avangin ni 22.12.2015-ah Synod Hospital-ah a lut leh a, thisen unit hnih pek nghal a ni a, a tuk zanah thisen unit li pek leh niin, internal bleeding a neih nasat avangin thisen a hloh nasa hle a, ni 24.12.2015 zing dar 9:00 vel atangin a dinhmun a hniam zual a, nikhua a hre zui ta meuh lo a ni. Doctor leh nurse-ten theihtawp an chhuah chung pawhin a harh hlei thei ta lo va, zan dar 6:10-ah natnate awm tawh lohna hmunah Pathian angchhunga chawl tawh turin min kalsan ta a ni. Dam lova a awm chhung zawngin a vui ngai lo va, amah enkawltute chungah lawmthu a sawi reng a, a chhungte dang hnenah pawh vui lo turin a hrilh fo va, natna khuma a mut lai reng pawhin Pathian pawlna a dawng nasa hle. Ni 22.12.2015 tlaiah zêl angin a awm a, chutah chuan amah rawn pawltu Isua leh Vantirhkoh a hmu nia ngaih theihin a tawng chhuak a, chuta a thusawi chu, “Khi, min lo hmuak a nia,” tih a ni a, ni 24.12.2015 zing dar khat leh a chanve vela a thusawi chu “Pathian hi a tha a ni” “Isua neih ka duh zawk” tih te a ni a, a thlamuanthlak hle. A rawngbawl chhung hian nupa tuak 29 a inneihtir a, mi 185 baptisma a chantir bawk a ni. Rev. Chawnghmingliana hi a hnaa theih tawp chhuah mi, a awmna apianga mite fak hlawh a ni a. A Bial te pawhin an ngaina hle a, Bial vawng thei lo a ni tih hre mah se Zamuang Bial chhung mite chuan hmun danga sawn lo turin kan hotute an la ngen hial a ni. Rawngbawltu inpe, la valai tak mai kan lo then ta hi Synod tan channa nasa tak a ni.
VUINA PROGRAMME
A hun : Ni 25.12.2015, Dar 1:00 p.m. Zirtawpni (Krismas Ni)
A hmun : Republic Vengthlang Kohhran Biak In
Vuitu : Rev. H. Lalrinmawia, Moderator
Hla sak ho : Van hmun ropui hmangaih ram khi (KHB No. 489)
Chanchin sawi : Upa H. Ronghaka,Synod Secretary (Sr.)
Zaipawl : Republic Veng Bial
Thlamuanna Thuchah : Vuitu
Zaipawl : Republic Vengthlang Kohhran
Tawngtaisakna : Rev. Lalzuithanga, Senior Executive Secretary
Hla sak ho : Lalpa, i rawngbawla min koh hi (KHB No. 399)
Malsawmna : Rev. H. Remthanga, Finance Officer
Thlanmual : Rev. C. Lalbiakhluna, Bialtu Pastor