Thu ziak hlui vawn thatna (archives) hi hmasang atangin engemaw chen chu lo nei tawh thin mah se, kalhmang mumal taka neih tan chu French Revolution (1787-1799) atangin niin an sawi. Kum 1789 khan France ramah National Archives an din tawh a ni.[1] Mizorama kan neih tanna chu a la rei lo. Mizoram Sawrkar chuan 1979 khan a nei tan a, State Museum-ah behtir a ni a, 1985 khan Mizoram State Archives hming pu-in a indang ta a ni. Kohhran hma lakna chu a tlai leh deuh. Mission Vengthlanga Aizawl Theological College a awm lai (1988 hma lam) khan Library-a lehkhabu dahna (thinga siam bookshelf) pakhat pawn lamah chuan “Archives” tih ziak a intar thin a. A chhungah chuan Synod bu hlui tlem leh Bible Hrilhfiahna bu hlui tlem tih loh chu thil dang a awm lo. State Archives-ah pawh khian Sawrkar record leh thil pawimawh tam tak a awm naa Kohhran lam thil chu a tam lo.

2. Synod Hma lak tan dan:
Archives neih ngaihtuah tantu chu Synod Publication Board a ni. Kum 1987 khan bul tan dan kawng a zawnnaah, engtia tih tur nge ni ang tiin Synod Executive Committee a rawn a. Chu mi ngaihtuahna kal zela SEC rel dan chu hetiang hi a ni: Synod Office-a thil hlui neih sa chhunzawmin Synod Office-ah a bul tan a ni ang a. Synod Office-ah pindan remchang zawngin, furniture leh hmanraw mamawh zawng zawng 1989 chhunga neih nghal vek a ni ang. Hna dang nena kep theih a nih chhung chuan thawktu hran la lova kep tur a ni ang. Sum hman tur pawh Rs 2,02,710.00 ruahman nghal a ni.[2]  SEC chuan Theological Education Board-in Archives changtlung zawk Aizawl Theological College puala buatsaih a rawtna chu 1988 November khan a pawmsak bawk.[3]

Aizawl Theological College-ah chuan 1988 kum tawp lam atangin thuziak hlui lakkhawm chu tan a ni a. Synod lam chu a muangchang hret. Kum thum hnu-ah Centenary Committee-in Archives neih thuai thuai tul a tih thu SEC-ah a thlen a. ‘Centenary Archives’ ni se la, thawktu hran pawh nei nghal se. Hei hi SEC-in Archives a lo ruahman thin tihhlawhtlinna anga ngaih ni se’ tiin ruahmanna a siam a. SEC chuan Archives a lo ruahman mek chu rin nghal ni sela, Centenary Committee-in a bawhzui ang, tiin a rel ta a ni.[4] Archives tana building hran sak rawtna chu bawhzuiin Ram leh In Committee chuan Zosaphluia Building chungah Committee Room a sa a, chumi peih fel hun chuan Committee room hlui chu Archives atan hman tura tih a ni ve ta thung a.[5]

Archives hmun tur buatsaih mek lai chuan 1992 May atang khan Synod Office chung zawl chhuah chhohnaa hmun awl zau vak lo chu bul tanna atan hman a ni a. Synod Office file hlui te (eng emaw zat chu lo halral tawh a ni a), Synod Bu hlui leh lehkhabu hlui dang awm ang ang kudam-a an lo vawm khawm te chu dah luh a ni a. Hna dang nena kaihkep lovin thawktu pawh a hrana lak a ni a. [6] Synod Committee Room thar peih fel hnu chuan Committee Room hlui chu Archives atan chei that a ni a. Synod Information & Publicity nen inluahsemin, February 12,1996 khan hmun thar chu luah a ni ta a ni.[7]

3. Material lakkhawm chungchang:
Archives atan lakkhawm leh dah that tur chu a tir berah chuan SEC-in a rel a. A hnu lamah a tul anga thlir thar zel a ni a, a tam tham tawh khawp mai:

1) Minute hlui – Assembly, Synod, Presbyteries, Synod Bu te.
2) Inneihna leh Baptisma Record bu te.
3) Synod Department tina file leh Record hlui an hman tawh loh, kum sawm hma lama mi.
4) Synod Account bu hlui zawng zawng.
5) Welsh Mission record hlui Saprama mi te pawh[8].
6) Kan Kohhran leh ram chhunga thuziak Presbyterian Church of Wales-in a kawl zawng zawngte chu English-a lehlina type vek a ni ang a, chu chu a theih ang anga hmain duplicate copy neiin lak luh vek tur a ni. Heng pawh hi fel taka register-a, index nghal an ni ang.[9]
7) Lehkhabu leh Magazine-ah chuan a tul ang zelin a thar pawh dah a ni ang.[10]
8) Office leh Department file pawimawhte Archives-a dah turin Department-te hriattir.[11]
9) Heng bakah hian tun hnai khan Archives Committee chuan hetiang hian hma a la bawk.[12] a) Pastor Bial Inkhawmpui Minute, Bial Kohhran Hmeichhe Inkhawmpui Minute, Bial KTP Conference Minute te vawn that atan dah tura dil.
b) Mission Field Working Committee leh Field Committee minute dil.
c) Department hrang hrang minute neih tawhte enfela la neih lohte dil.
d) Synod Circular, Appointment leh Office Order-te Department hrang  hrangah Xerox copy dil a, a thar zelte copy Archives pe ve thin tura dil.
e) Kohhran pawl dangte chanchinbu leh kan Kohhran chhuah chanchinbu hrang hrangte lakkhawm.
f) Pension-te Service bu, Audit Report, Department Recruitment Rules, Department-te Seminar/Workshop paper leh Publication.
g) Welsh Mission Record Mizorama mite neih ang ang zawn khawm. 

Inneih leh Baptisma Register te chu a hmangtu Pastor leh Upate an awm tawh loh emaw, an hman tawh lo hnuah emaw Synod Office-ah theh luh a ni a. Chanchinbu leh thil dang tam tak chu a nei leh kawl tha te hnen atanga lakkhawm a ni ber. Kohhran leh mimal hnen atang pawhin engemaw zat chu dawn a ni bawk. Lakkhawm tura ruahman, tuna neih tawh zinga a pawimawh deuhte han tarlang ila:

1)      Inneihna leh Baptisma Register te hi hmuh tur awm ang ang chu dah that a ni a. Mizoram Rambuai avanga bo leh vawn that tawk loh avanga hmuh tur awm ta lo erawh chu a awm nual.
2)      Minute hlui - Assembly/General Assembly minute te, Synod minute te chu a bu (printed) siam tirh atangin tun thlengin kim taka lakkhawm a ni a. Presbytery minute 1910-1924 pawh Upa Chalhnunan kutziaka a lo lak chhawn (copy) a awm bawk a (Original copy chu hmuh tur a awm tawh lo). Synod Standing Committee leh Executive Committee minute kutziak leh cyclostyled/printed copy te pawh neih kim a ni a. Presbytery hrang hrang leh Bial minute te, Committee hrang hrang minute te pawh engemaw zat lakkhawm tawh a ni a. Aizawl Kohhran Upa Thuremna Bu (Mission Veng Kohhran Committee minute bu hmasa ber, 1910-1934) photo copy pawh vawn that a ni (Original chu ATC-ah a awm).
3)      Synod Office-a inchhung khawm chin Office hrang hrang files leh record hlui leh hman tawh loh (‘closed’) eng emaw zat kawl a ni.
4)      Lehkhabu hlui leh thar (history lam) leh document pawimawh eng eng emaw te lakkhawm a ni a, belhchhah zel a ni bawk. 

SEC-in a ruahmannaa lang lo thil dang pawimawh tak tak lakkhawm leh dah that a ni bawk a, chung zinga a pawimawh zual te chu tarlang ila:

1)      Kan Kohhran chanchinbu hrang hrang – Kristian Tlangau, Didakhe, Ramthar, Agape, Kristian Thalai, etc. - a chhuah tirh atangin neih vek a ni.
2)      Mizo Bible lehlin hrang hrang, hrilhfiahna bu thenkhat leh Mizo Hlabu edition hrang hrang.
3)      North East India Christian Council Proceedings (1940 atangin).
4)      Presbyterian Church in India General Assembly Minutes 1904-1925 (photo copy).
5)      Nilai Zan leh Beihrual Thupui bu te.
6)      Dan bu hrang hrang – PCI Dan Bu, Service Rules, Synod Sum Vawn Dan, Nupa Chungchang Dan, etc. te a tir atanga lakkhawm.
7)      Kohhran mal, Bial leh Presbytery te chanchin Gospel Centenary kum leh a hnu lama chhuah te.
8)      Chanchibu hrang hrang (Daily, Weekly, Monthly, etc.).
9)      Mizo leh Vai Chanchin 1903-1942.[13]
10)   Thlalak hrang hrang.
11)  Hun pawimawh thenkhat thlalak (Video CD).

Synod Archives Enkawl Dan leh Hman Dan
SEC leh OM-in a rel bak chu Executive Secretary i/c Archives kaihhruainaa enkawl a ni ber a. Synod Archives neih rawt tan kum 1988 khan SEC chuan Archives Committee siam turin lo rel tawh mah se, kum 19 hnu 2007 November khan din a ni ta chauh va.[14] He Committee-ah hian Executive Secretary i/c Archives telin member panga an awm. A tir lamah building hran sak tul tih ni mah se, a hran sa lovin room remchang buatsaih thin a ni a. Duhthusama zau a ni thin lo mah se, awmze nei taka kalpui theih a la ni zel. A tir lam atangin enkawltu bik, Archivist leh thawktu dang, OA leh IV Grade an awm a, a tul angin lak belh a ni bawk. A hmangtuten an thil duhte anmahniin la chhuaka dah lut mai lovin, thawktuten tihsak vek a ni a. Tul bik leh phalna bik awm lo chuan engmah hawh chhuah phal a ni lo. A enkawltuten thahnem an ngai a, an duhtui bawk a, thil neihte a him thawkhat hlein a lang.

File hlui tih loh Material dang te chu Steel Almirah-ah dah a ni deuh vek a. Ei chhetu laka veng turin Kawpur (Naphthalin balls) hman a ni a. Tun hnai khan lehkhabu vawn thatna damdawi (Selica gel) hman a ni a, a tangkai ngei a rinawm. Boruak hnawng laka veng turin office hour chhung chuan electric heater hman thin a ni a. Tunah chuan room tihlum khawl Heat Convector pahnih lei a ni a, a tangkai turah ngai ila. Archives neih rawt tan tirh khan mamawh lei tur zingah Air Conditioner (1 ton) dah tel a ni a,[15] mahse hei hi chu mamawh ngaihtuahnaah a lang zui ve ta rih lo a ni ang. 

Lehkhabu leh document te hi tam tak chu original copy ni lovin, Aizawl Theological College-a mi leh mi hrang hrang ta photo copy-a lak a ni a. Copy pahnih/pathum te siam vek a ni a, a hmangtute hman tur  copy bik pawh ruat a ni. Tul bikah lo chuan original copy neihte chu hmantir a ni ngai lo. Tunah hian document thenkhat - Inneihna leh Baptisma Register te chu photo copy bakah  computer-ah dah luh mek a ni a. Document hluite copy siam nan a tir atangin Xorox Copier khawl neih a ni a, a tangkai hle a. Computer pahnih leh Scanner pawh neih a ni bawk.

Synod Archives hi a tangkai khawp mai, ni tin mi eng emaw zatin an hmang thin. Synod hotute tan record pawimawh zawn chhuahna hmun a ni a. Research beitu te pawhin an hmang tangkai tawh hle a ni. A hmangtu tam ber chuan pian kum leh ni te Baptisma Register atangin an en a. A duh hnenah chuan Executive Secretary i/c Archives hming ziak hnanin pian kum tarlanna Certificate pek thin a ni. Inneih Register pawh tul bik atana hmang an awm bawk thin. Mizoram Presbyterian Kohhran chanchin chhui duhte tan hmun danga kal lovin hetah hian mamawh tam tak chu hmuh theih a ni ta.

3. Din chhan leh tum te
Thupui ber a tawp lama dah tlat chu a mak deuh awm e. Synod Archives din leh kalpui zelnaah engvanga din nge tih leh enge a tum tih sawi lan a nih loh avangin a hmalama kan sawi tawh atang khian a din chhan leh tum kan sawi dawn a ni.  Material lakkhawm tur ruahman te, ataka lakkhawm leh enkawl zui dan atangin thuziak leh lehkha (documents, records & Office files) hlui pawimawh te, chanchin (history) ziakna bu te, chanchinbu (Newspapers & magazines) chi hrang hrang te dah thata, a tul huna  hman theih tura awmze nei leh mumal taka dah leh vawn that chu a din chhan leh tum a ni a. Chu chuan mumal taka thliar fel (systematic classification) te, kum rei tak vawn that theih tura a dahna hmun  leh dah that dan buatsaih te, a hmangtute tan remchang siam te, him taka enkawl dan ruahman te pawh a keng tel vek a ni. A tir atangin a dintute rilruah heng zawng zawng hi awm nghal lo mah se, hun lo kal zelah a tul dan ang zela kalpui tur tih pawh thil chiang sa a ni bawk.

Thil hlui, nakina la tangkai turte hi hriat a harsa a, dah that nachang pawh hriat loh theih tak a ni. Khawsaknain a zir loh chuan thil dah thatna hmun pawh neih loh theih a ni bawk. Hei vang hi a ni ang, Mizoramah hian thuziak hlui kawl tha an tlem khawp mai, ‘a hlui tawh lutuk’ tia paih leh tiral kan lo ni deuh vek mai! Entirna tlem han tarlang ila: Kristian Hla Bu 1899-a chhuah leh a hnu zela mi te chu hmuh tur a vang hle. Mizo Bible lehlin hrang hrang pawh chhut (edition) khat bak kawl tha an awm lo tluk a ni.  Kristian Tlangau pawh a zawna zawn khawm tak meuh a ngai. Synod Bu leh Dan bu hrang hrang te pawh hman mek copy bak dah that a ni mang lo va, Sande Skul zirlai bu te, Nilai leh Beirual bu te pawh hmuh kim a awl lo. Lehkhabu leh chanchibu te pawh chutiang chu a ni deuh vek.

Hetiang dinhmun hi hriain Synod hotute chuan Mizoram Kohhranin kum za a tlin dawn hnaiah khan thuziak hluite lakkhawma dah thatna ‘Archives’ siam an rawt ta a. An hmalakna kal zelah tun dinhmun hi kan lo thleng ta a ni. Inneihna leh Baptisma Register te tih lohvah chuan Synod Archives aiin Aizawl Theological College Archives-ah thil hlui a awm tam hmasa zawk a, tunah chuan a intluk tlang viau tawh ang. A pahniha lak kawp chuan Mizoram Presbyterian Kohhran Archives neihte hi tangkai tham ve tawh tak a ni. Tuna mite tan a pawimawh a, thangtharte tan a la tangkai lehzual ang a, a din chhan leh a tum hlawhtlinna leh hlawkna te pawh a la lang zel dawn a ni.

Hmasawnnain thil thar a rawn keng angin Archives lamah pawh hmel thar a lang ve zel.  Lehkhaa thuziak bakah thlalak (photographic records) te, thlalak che thei (motion pictures) te, thusawi leh zai, etc. ri theia dah (sound recordings) te, computer hmanga thil dah (computer-kept records) te hian vawn that tur a rawn belhchhah a. Heng lo pawh hi thil thar a la awm fo ang. Ngaihtuahtuten thil lakkhawm tur an ruahman leh lakkhawm atang hian Mizoram Presbyterian Kohhran chhunga thuziak leh record hluite ngaih pawimawh hmasak a ni a. A dangte hi chu mi zara lo lang chawp, a remchan anga lakkhawm leh dah a ni ber. Archives Commiittee chuan Kohhran pawl dangte chanchinbu te pawh lakkhawm nise tiin a rel thar a. Mizorama Kohhran pawl dangte chanchin hriat theihna tur – an inkhawmpui leh committee minute lakkhawm te, Mizoram chanchin hriat theihna tur chanchinbu leh lehkhabu lakkhawm te pawh thil pawimawh leh tangkai tak chu a ni ang. Amaherawhchu, hmun leh hmanrua leh thawktu kan neih theih dan te enin chutiang chuan hma la zau dawn ta ila kan titha thei ang em tih erawh chu ngaihtuah chian a ngai ang. Mizoram Presbyterian Kohhran chanchin hriat leh chhui theihna tur hi ngaih pawimawh hmasak ber ni zel se. A bakah chuan a remchan dan ang zelin Kohhran dangah pakai ta ila. Mizoram chanchin, Kohhran nena inkaihhnawih tih loh chu hma tel tum rih lo ila kan tlin tawk a ni mai thei e.

Tichuan, kan din chhan leh tum ber chu Mizoram Presbyterian Kohhran chanchin atana pawimawh thei tur thuziak leh record te zawn chhuah leh lakkhawma dah that ni zel se. Kohhran leh thangthar lo awm zel turten an mamawh tur hun kal tawh leh keimahni huna mi thil pawimawhte hi dah tha zel ila. Mahni hun theuhvah tha taka kan tih chuan hun a lo kal zel ang a, kan Archives hi a pawimawh telh telh dawn a ni.

4.  Hmabak
Synod Office thar sak mekah hian Archives changtlung tak neih theihna tur ruahman a nih beisei ila. Chutih hunah chuan hmasawnna atana pawimawh tam tak zingah hengah te hian hmalak hmasak theih ni se:

1)      Air Conditioner: Archives neih tum tirha mamawh ruahmanna hmasa berah khan dah tel tawh a ni a. Khawiah pawh Archives-ah chuan Air Conditioner dah zel thin a ni a. Monsoon area Mizoram angah phei chuan a tul zual.

2)      Tuna Archives-a dah tawh zingah hian thil vang, hmuh mai tur awm tawh lo (‘rare material’)-a chhiar theih eng emaw zat, kum sawmnga atanga kum zaa upa te an awm a. A lehkha (paper) paper-te pawh daih rei lo tur hmel a awm nual. Kan tih mek bakah hian hmun danga tih ang - micro-film, micro-fiche leh thil danga thuziak dah that dan te pawh zira tih ve a tul ang.

3)      Thlalak (photographic records) te, thlalak che thei (motion pictures) te, thusawi leh zai, etc. ri theia dah (sound recordings) te, computer hmanga thil dah (computer-kept records) te pawh mi lo tih tawh dan enin dah that rei theih dan ngaihtuah a ngai ang.

4)      Kan thil dah thatte zawn chhuah zung zung theih nan, tuna kan tih mek bakah, hmangtute tana remchang turin Zawnawlna (Index card) mumal leh kimchang tak siam ni se. Chu mi atan chuan a number pek dan pawh archives changtlung zawk te tih dan anga kalpui ni se.

5)      Material lakkhawm belh chungchangah hmalakna tur a la tam viau. Kan tih dan pangngai baka kal theih dan a awm chuan a sawt deuh ngei ang. Synod Department zawng zawng pawhin mahni thil kan dah that theuh bakah Archives-a vawn that tur pek nachang kan hriat lehzual a tul hle a ni.

6)      Welsh Mission record hlui Saprama mi lak chhuah hi kum sawmhnih liam ta atanga tum tawh a ni a. Kan cho lo nge, tul kan ti ta lo zawk nge, hun remchang kan la nghak hriat thiam a har viau. Kan Missionary-te an liam zawh hmaa tih theih ni se a tha awm e. 

Tlipna:
Hmasawn tuma hma lam kan thlir mek laia thil hlui lo buaipui vak mai hi tul ti lo an lo awm pawhin a mak lo vang. Archives material lakkhawm lai chuan a hlui apiang hian mit a la lehnghal a, tuipui lo tan chuan nuih tiza tak tur a ni. Kum 2000 Millennium lawm tum khan America chuan an lawmna thupuiah, “Honor the past, Imagine the future” tih an hmang a. ‘Hun kal tawh zahin chawimawi la, hma lam thlir thiam rawh’ tihna ang deuh a ni awm e. Hun kal tawh tel lo chuan hmabak a awm thei va, ruahmanna fel tak neih loh chuan hma sawn theih a ni lo bawk. Thil kal tawhte zir chiangin, kal zelna tur ruahman tur a ni a. Hmana mite avangin keini hi kan awm a, nakina mite pawh keimahni avanga la awm tur an ni. Archives-ah hian hman leh tun leh nakina mi-te inzawmna thu pawimawhte chu vawn that a ni thin a. Thangthar lo kal zelte thlun zawmtu a ni ber mai. Israel-ten Abrahama hun BC 2000 vel atanga Isua hun thleng chanchin an hre thei kha a tirah tawngkaa thu inhlan chhawn atangin ni mah se, a hnuah chuan thuziak dah that atangin a ni ber. ‘Chhinlung’ atanga Mizo lo chhuakten savun lehkha an hum chhuah kha ‘uiin lo ei’ hlauh lo se chuan khawi atanga lo chhuak nge kan nih hi chhui chhuah a awl deuh tur a nia!  Archives-a thuziak leh thil dang kan dah thatte pawh hian kum 100 te, 150 te, 500 leh 1000 a liam hnua thangthar lo la awm turte hnenah an hmuh leh hriat phak loh ‘thuruk’ a hlan chhawng zel dawn a ni.
 

---

[1] Kum 1789 khan France ramah National Archives an din a, 1796-ah Archives Department an din bawk.

  Heng hi tun laia ‘Archives’ an tih ang chi-a a hmasa ber a ni awm e. Chu mi hnu chuan ram dangah pawh an nei ta zel a. United Nations leh khawvela pawl hrang hrangte pawhin archives an nei a. Kum 1948 khan UNESCO thlazar hnuaiah Archives lama tui miten Paris-ah The International Council on Archives  an din a ni.

[2] SEC 106:21 of 5.11.1987; 109:6 (f) of 23.6.1988; 110: 13(b), 33 dt. 3.11.1988.

[3] SEC 110:13(b), dt. 3.11.1988.

[4] SEC 124:37(b) dt. Oct. 31-Nov. 4, 1991.

[5] SEC 129:85 dt. 5.6.1992; 136:33 dt. 10.9.1993; 137:29 dt. 3.11.1993.

[6] Tv. Lalhmachhuana (tunah Rev. Z.D. Lalhmachhuana), B.D. zir zo hlim chuan a bul tanin  May atanga December thlengin a enkawl a. Nl. Lalnunchamin he mi kum December thla atangin a enkawl ve leh a. Archivist hmasa ber Tv. Lalnuntluanga chuan January 2 – Sept. 15 1994 khan a thawk a. Tuna Archivist tang lai Pi Laldawnkimi hian January 1995 atangin a thawk tan.

[7] SEC 152: Secy. Reports No.18 of 5.6.1996.

[8] SEC 109:6 (f) dt. 23.6.1988, Appdx. III.

[9] SEC 110:33, dt 3.11.1988, Appdx. 5.3.

[10] OM 22:5, 19.8.1996, Appdx. 2.

[11] OM 16:21 dt. 25.7.2007.

[12] Archives Committee 1: (2), (3) dt. 11.12.2007; 2:II.(2) dt 21.4.2008; 2:II. (3), (4) dt 21.4.2008

[13] Lehkhabu leh chanchinbu hlui te OM-in a tul anga lei a phal angin hei hi a original copy lei a ni (OM 14:1(a) dt 18.5.1996).

[14] SEC 110:33, dt. 3.11.1988; 214:72 dt. 9.11.2007; OM 21:8 dt 12.11.2007

[15] SEC 110:33 of 3.11.1988, Appdx 5.