Nimin (Feb. 4, 2016) chawhma dar 10:00 atangin Synod Office-a J.M. Lloyd Hall-ah Synod Hospital Board Meeting vawi 126-na neih a ni.
Meeting hi Rev. H. Lalrinmawia, Synod Moderator-in a kaihruai a, Medical Superintendent Dr. Lalthakiman Secretary reports a pe. Secretary Reports atanga a lan danin Synod Inkhawmpui vawi 92-na in a rel angin Dr. L.H. Thanga Singson, Hospital Director chuan a hna a zawm a, Synod Hospital Board vawi 125-na chuan Medical Superintendent atan Dr. Lalthakima, M.S. (Ortho) leh Dy. Medical Superintendent atan Dr. John Malsawma, M.D (Paed) te an ruat angin an hna hi an zawm fel tawh bawk a, pension a chhuak tawh tur, Upa F. Lalsangliana, Coordinator pawhin kum 2 chhung atan a hna ngai a thawk chhunzawm bawk.
Nikum (2015) atang khan Pi Puii In (Private Ward) chu luah fel a ni tawh a, tunah hian Room pangngai 24 leh Deluxe Room 6, a vaiin Room 30 luah theih a ni. Pi Puii In-a Eye Block thar pawh nikum khan hawn a ni tawh bawk. Oxygen Generator AIRSEP (USA) Imported Oxygen Concentrator Model AS-J chu bun fel a ni tawh a, February thla chhungin hman theih beisei a ni. Doctor Quarters sak mek niin First Phase-ah Doctor 4 luah theih tura buaipui mek a ni. January 27, 2016 khan May Bounds Hostel (Student Nurses Hostel) sak thar chu Synod Moderator Rev. H. Lalrinmawian Pathian hnenah hlanin a hawng a. He hostel hi RCC Building a ni a, chhawng ngaa sak a ni a, Room 51 awmin zirlai 126 (mipa 18 leh hmeichhia 108) awm theihna tura ruahman a ni. Recreation Hall a awm bawk a, he Hospital-a Mizo Nursing Superintendent hmasa ber hming chawiin Lalzikpuii Hall tia vuah a ni a, Pi Ziki Hall tia lam a ni ang.
January 2016 chhungin KTP Saikhamakawn Branch leh SCMI, ATC, Durtlang ten thisen an pe a, a vaiin 71 Units lai an dawng a ni. Tun tum Board meeting-ah hian thu pawimawh tak tak 6 zet ngaihtuah a ni a, chung zingah chuan Nursing College din chungchang te, John Williams Hospital enkawl dan enthat te, Thawktu confirm dilna te, Mit zaina khawl (Phaco Machine), Bank Loan-a lei dilna te leh Sum harsatna chungchang te chu a langsar zual an ni.