Vawiin (Feb. 5, 2016) chawhma dar 10:00 khan Pain & Palliative Care Centre, Synod Hospital Durtlang a mi chu Rev. P.C. Pachhunga, Executive Secretary, i/c. Hospital etc, chuan Pathian hnenah hlanin a hawng.
Hawnna inkhawm hi Pi Puii In, Synod Hospital-ah hman a ni a, Dr. Lalthakima, Medical Superintendent in a programme a kaihruai a, Rev. Ramdinmawia, Senior Chaplain in hunserh a hmang a, he Centre hawn a nih theih nana bul tumtu Pallium India, Trivandrum -a an hotu pakhat Dr. Prabakaran Naira’n thusawina hun a hmang bawk. Palliate tih awmzia chu natna tihdam ni si lova tih nep sak hi a ni a, Palliative Care tih chu natna khirh bik, damdawi thiamna ina a tih dam theih tawh loh te enkawlna a ni. Mi, natna dam thei tawh lo, dam tura beisei tawh loh te, an hun la hman tur ang ang te a tha thei ang ber leh na awm lo thei ang bera enkawlna pek hi Palliative Care-in a tum ber chu a ni. Dam lo mai ni lo, dam lo enkawltute leh an chhungte tha taka bawhzuina lo pek te pawh a huam bawk a ni.
Natna dam thei lo tam tak zingah khawvelin a ngaih pawimawh ber chu Non Communicable Diseases (NCB) zinga mi Cancer hi a ni a, Cancer bakah chuan Stroke te, natna dang avanga zeng te, kal thalo te leh AIDS natna te hi an ni. Heng natna vei te tawrhna hi a namai lo khawp mai a, taksa mai bakah rilru lam te, khawtlang leh chhungkuaah te, thlarau lam nun thleng nghawng thei a ni a, enkawlna tha pek hi an mawmawh hle a, hei tak hi Palliative Care-in a tum chu a ni. Hetiang enkawl hna hi mi pakhat tih mai theih a nih loh avangin thawhho a ngai a, Doctor te, Nurse te, Social Worker te leh Counsellor te tan hona chuan enkawlna tha tak a pe thei a ni. Palliative Care in service a pek theih te chu : In-patient care te, Home Care te, Day Care/OPD te, Hospice Care te leh Lusunna (bereavement) Care te an ni.
Hetiang enkawlna hi mi tam zawkin kan la hre lo mai thei a, mi natna beidawn thlak tak nei te an hun tawp lam hahdam zawka an hman ve theih nan mihringte hian tih theih tam tak kan la nei a, Pathian kutah dah ringawt lova kan tih theih ang ang te kan tih ve hi a tul hle a ni.