Nimin (Feb. 7, 2016) khan Synod Mission Board hnuaia Missionary lak thar mi 104 te tirh chhuahna inkhawm, Bawngkawn Kohhran Biak In-ah neih a ni.
Tirhchhuah inkhawm hi Synod Mission Board Secretary Rev. K. Lalrinmawian a kaihruai a, Synod Mission Board Coordinator Dr. Robert S. Halliday-an missionary kal chhuak turte inhmelhriattirna hun a hmang a, Synod Moderator Rev. H. Lalrinmawian tirh chhuahna hun hmangin thuchah a sawi. Bawngkawn Bial Zaipawl leh Synod Mission Choir te an zai a, tirhchhuahte aiawhin Zonunmawian thu tawi a sawi leh a, Executive Secretary Rev. B. Sangthangan tawngtaisakna hun a hmang a, Senior Executive Secretary Rev. Lalramliana Pachuau-in malsawmnain inkhawm a tin a ni.
Synod Mission Board hnuaia field hrang hrang 19 atana missionary lak tharte hi Evangelist Teacher tur mi 28, Evangelist tur mi 61, Staff Nurse/Health Worker tur mi 8, Craft Teacher tur mi 6 leh Chama Gospel Team atan mi 1 an ni. Heng bakah hian Mission field hrang hranga thawk tur Ordained Minister 5 leh Bial vawng tur mi 13 tirh chhuah nghal an ni a, Missionary tang lai, kum 2016-a pension-a chhuak mi 7 te hnenah Ngaihhruina thuziak (citation) hlan an ni bawk.
Jan.6 - Feb. 5, 2016 chhung khan heng missionary lak tharte pual hian Pre-Service Orientation, Mission Veng Kohhran Hall- ah an lo nei tawh a ni.