March 11- 13, 2016 chhung hian Mission Vengthlang Kohhran Biak Inah Mizoram Presbyterian Kohhran Hmeichhe Rorel Inkhawm vawi 8-na neih mek a ni. Rorel Inkhawm thupui atan ‘Thlarau Thianghlim leh a hnathawh’ tih an hmang a, Speaker atan Rev. Lalrinmawia an hmang.
Nimin (March 11, 2016) kha Palai thlen kim ni a ni a, zanah Inlawmna leh Report Inkhawm neih a ni. Inkhawm hi Pi Rinchawii, Central Kohhran Hmeichhe Chairman in a kaihruai a, General Secretary Report leh Bial Report khaikhawm ngaihthlak a ni a, Synod Moderator Rev. H. Lalrinmawian Pathian thuchah a sawi a, Chanmari West Bial Kohhran Hmeichhe Zaipawl an zai bawk.
Vawiin (March 12, 2016) hian nilengin Rorel a ni ang. Tun tumah hian General Agenda 16 an nei a, Bial atanga thu lut, floor-a kal zel lo tura Central Committee-in a hrilhfiah engemaw zat a awm bawk. Heng bakah hian kum 2018 Rorel Inkhawm chungchang te, kum 2019 Inkhawmpui Lian chungchang te, Inkhawmpui Lian Budget leh Project 2016 - 2017 leh Bial Budget ruahmanna te an ngaihtuah bawk ang. Zan inkhawmah Rev. P.C. Pachhunga, Executive Secretary i/c Kohhran Hmeichhia in thuchah a sawi ang a, Vaivakawn Bial Kohhran Hmeichhe Zaipawl te an zai ang.
March 13, 2016 (Pathianni) chawhma inkhawmah Speaker Rev. Lalrinmawian ‘Thlarau Thianghlim leh a hnathawh’ tih thupui hmangin thuchah a sawi ang a, Sunna hun leh Kristian Chhungkaw Dinhmun Tehna Trophy leh Certificate hlanna hun hman a ni ang a, Venghnuai Bial Kohhran Hmeichhe Zaipawl an zai ang. Chawhnu inkhawmah Speaker hnen atangin thuchah ngaihthlak leh a ni ang a, Ramhlun Vengthar Bial Kohhran Hmeichhe Zaipawl an zai ang. Inkhawm banah hian Mual Inkhawm (Zaikhawmpui) neih a ni ang. Zan inkhawmah Speaker hnen atangin Pathian thuchah ngaihthlak leh a ni ang a, Mission Vengthlang Bial Kohhran Hmeichhia leh Mission Vengthlang Pastor Bial Zaipawlte an zai bawk ang.
January - December 2015 Bial Chanchin Report Khaikhawmna :-
Kum 2015-ah Mizoram chhung leh pawn a mi, Mizoram Synod hnuaia awm Kristian Chhungkaw dinhmun tehnaa tel Bial 187 an awm a, bial 2 atngin report a lut lova. Bial 185 atanga Report khaikhawmna hetiang a ni.
1. Report lut zat : 185
2. Kohhran zat : 808
3. Branch Church zat : 81 (Total : 889)
4. Presbyterian hlang chhungkaw zat : 1,01,907
5. Inawm pawlh chhungkaw zat : 4,342
6. Chhungkua zawng zawng zat : 1,06,249
7. Nitin chhung inkhawm nei zat : 67,087 = 63.14%
8. Buhfaitham tham ziah zat : 1,04,018 = 97.90%
9. Hmeichhe member zat : 1,69,961
10. Member tam berna Bial : Bethlehem Bial
11. Member zat : 3,229
12. Member tlem berna Bial : Bangalore
13. Member zat : 36
14. Hmeichhe inkhawm nei thei vek Bial 158 an awm a, Bial 27 atangin inkhawm thei lo Kohhran/Branch Church 48 an awm.
Kum 2015 hian ni tin chhung inkhawmah kum hmasa aiin 1.55%-in an pung a, Buhfaithamah 0.15% in an pung a, nikum (2014) aiin Zâa za tham hi Bial 11 -in an pung bawk. Kristian Chhungkaw dinhmun tehnaah N.E. Khawdungsei Bial an sang ber a, tun tum hi kum 14 a zawna a sang ber nihna an hauhna a ni a; Certificate leh Trophy hlan an ni. Kristian Chhungkaw dinhmun tehna hi kum 1970 atang khan neih tan a ni a, a sang ber hnenah Certificate leh Trophy hlan thin an ni. Kum 1970 hma lak kha chuan Buhfaithamah chauh intehna an siam thin a, a sang ber hnenah chawimawi nan Shield an pe thin a ni.
Thurel tlangpuite :
Rorel Inkhawmah hian palai 455 (Palai = 388, Central Commt. Member = 47, Synod Puipate = 3, Central KTP Palai = 2, ATTWI member te = 7, PWJC, Myanmar - 4, Pastor = 2, Kohhran Upa = 1 & NEICCWA President = 1) an kal a ni.
1) Kum 2018 Mizoram Presbyterian Kohhran Hmeichhe Rorel Inkhawm chu March 9 - 11, 2018 chhungin Tuikual Kohhranah nghah a ni ang a, Kum 2019 Kohhran Hmeichhe Khawmpui Lian chu March 8 - 10, 2019 chhungin Kolasib-ah nghah a ni ang a, Kolasib Diakkawn, Kolasib Venglai leh Kolasib Hmar Veng Bial ten an thleng dawn a ni.
2) Kum 2016-17 Inkhawmpui Lian Budget leh Project atan hetiang hian pawm a ni Central Budget : Rs. 13,00,000.00 Women Centre : Rs. 20,00,000.00 Agape Chanchinbu : Rs. 3,00,000.00 Total : Rs. 36,00,000.00
3) Moral Reforms chungchang inzirtirna neih tha tih a ni a, a kalpui dan tur Central Committee-in ruahmanna an siam ang.
4) Synod Hospital, Durtlang tan Charity Fund pek leh tha tih a ni a, Kohhran Hmeichhe Inkhawm tum 2 thawhlawm pek ni se, an ti.
5) HIV/AIDS veite tanpui nan ram pum Kohhran Hmeichhia ten Thawhleh zan inkhawm tum khat thawhlawm chu Grace Home-ah pek ni se, an ti.
6) Central Committee atan khawpui chhung Bial tin atanga inruat tawh lovin tun aia tlem ni se, tih chu pawm a ni.
7) Ram pum huap sual thupha chawina leh chhiatrupna lo thleng thei laka kan him theih nan awmni khama tawngtai rualna neih ni se, tih a ni bawk.
8) Agape chanchinbu chhut man sang zelah a buatsaihna senso khuh turin a man sanna chawi belh ngai zawng hi Pastor Bial tin budget siam ni se, kum 2017-2018 atanga hman tan ni se, an ti a. Kumin (2016-2017) ah chuan Agape budget hi khawpui chhungah chauh intuk a ni.
9) Ei leh in fimkhur dan (Food Safety) ram puma inzirtirna neih rawtna chu pawm a ni a, Central Committee-in ruahmanna an lo siam ang.