March 11, 2016 (Zirtawpni) khan KTP General Conference vawi 56-na, Champhai pandal thiah laia a ruangam (structure) a tlu a. Hetah hian hnatlang zinga mi Tv. Vanmawia (kum 48) chuan a nunna a chan a, hliam 6 an awm bawk.
He thu an hriat veleh Central KTP hotute leh Synod hotute inrawnin, Central KTP Committee atangin General Secretary hovin mi 7 Champhai-ah an tlan chho nghal a. Tv. Vanmawia vuinaah KTP Gen. Secy Upa Zonunmawia’n thu sawiin Mizoram Synod leh Kristian Thalai Pawl chuan he vanduaina hi a tuarpui takzet a, Kohhran pawl bik sawi lovin Kohhran hrang hrangte pawhin an tuarpui thu leh vanduaina tawk chhungte ralna an dawn thu a sawi a. Synod Moderator Rev. H. Lalrinmawian tuarpuina thu a thawn chhiar chhuah a ni bawk. Hetah hian Synod-in a ralna Rs. 20,000/- leh Central KTP-in a ralna Rs. 10,000/- leh hmun hrang hrang atanga ralna an dawn tling khawm, avaiin Rs. 55,000/- chu CKTP Asst. Leader Pu Samuel Laldingliana’n mitthi chhungte hnenah a hlan nghal a ni.
Mitthi vui zawhah hian CKTP hruaitute chuan hliam tuarte an tlawh nghal a, dam lo kanna leh thlahualna Rs. 1,000/- theuh, mi 6 hnenah hlan a ni. Central KTP hruaitute leh Gen. Conference Organising Committee ten pandal sakna hmun an tlawh nghal a, hma lak zel dan turte an sawiho. Hemi thu bawhzui hian Synod chuan Synod Property Asst. Engineer T.Upa Thangliankhuma leh Upa K. Lalremruata, Office Assistant-te chu pandal tlusawp endik tur hian a tir nghal a. Organising Committee te nen endikin pandal thiah chhunzawm dan tur leh rinawm zawka pandal siamthat dan tur te an rel ho a ni.