Rev. Lalpianga (kum 85) pensioner chu tukin (Aug. 13, 2017) zing dar 6:55 khan Synod Hospital Durtlang-ah a thi a, vawiin chawhnu dar 1:00 khan Republic Veng Kohhran Biak In ah Rev. Lalramliana Pachuau, Ex-Moderator-in a vui a ni.
A chanchin tlangpui : Rev. Lalpianga hi July 6, 1932-ah Puallawi khuaah a piang a, a pa chu Zatawna a ni a, a nu chu Hrangchhungi a ni, Unau pariat an ni a, a ni hi a upa ber dawttu a ni.
Zirna leh hna thawhna lam : 1945-ah Sailulak Primary School-ah a lût a, pawl thum chu Sialhawk Centre-ah exam-in first division-ah a pass a. Kum khat a chawlh hnuah 1947-1949 chhûng Sialhawkah Middle School a kal a, pawl ruk chu second division-ah a pass a. Chhungkaw harsatna avângin kum khat a châwl leh a, 1951-ah mahni inchâwmin Imphal-ah lehkha a zir leh a. Hotel-ah tui chawia inhlawhin tui tin 10 chawiah chaw vawi khat ei a hlawh a ni. Hetiang hi a dinhmun a nih avangin Matric a zo thei ta lo va, 1955 atangin Teikhang Middle School-ah zirtirtu hna a thawk a. Teacher Candidate-in 1959-ah matric chu a zo ve leh ta a ni, 1960 atangin Aizawlah sawrkar hna (LDC) thawkin zan College a kal a, 1965-ah B.A. a zo ve leh a. Sawrkar hna hi department hrang hrang - Agriculture, Election Post Office leh Home Guard Office-ah te thawk kualin U.D.C a kai hman a ni.
Dt. 15.10.1965-ah Lalthahmingthangi, Mualpheng nen Mission Veng Biak Inah an innei a, fapa 2, leh fanu 1 an nei a, tu 9 leh tuchhuan 1 a nei. Sawrkar hna bansanin Synod hnuaiah zirtirtu training (Guru)-ah hna a thawk a. Ram buai kum a ni a, 1966 kum chuan training-ho chu a zawhtir thei hram a, 1967-ah khar a ni zui ta mai a. Synod Office-ah Accountant hna siam tharah a thawk zui ta a, a tleirawl chhuah, pawl ruk an zir lai atanga a lo chak tawh Pathian thu zirna remchang a melh reng bawk a. Remchang hmasaah a dil ve ta a. Tichuan Pathian thu zir tura lak a ni ve ta a, United Theological College, Bangalore-ah a kal ta a ni. Kum 1971-ah BD a zova, Theological College-ah Lecturer atan chawrzui nghal a ni a, 1972-ah Pro. Pastor atan lak a ni a, Champhai Bialah dah a ni, he bialah hian 1973 kumtawp thleng a awm a, Ramthar Board Asst. Secretary hna chelh turin 1974-ah lak a ni a. Mahse Executive Committee-in Cachar phai Bengali Christian-te enkawl hna Assembly kut atanga Mizoram Synod-in a lak chhawn turah Assembly Officer ni turin a ruat leh ta zawk a, April 24 1974-ah he hna hi a thawk tan a, hemi hna chelh chung hian Ramthar Asst. Secretary hna leh Durtlang Bial Pro. Pastor hna Pastor Challiana kaihhruaina hnuaiah a thawk pah a, Assembly Office-a a hna chu hnapui berah neihtir a ni. Cachar-a Assembly Officer hna chelh zel tur hian nemngheh mi a tul avangin 1974 Synod Mission Venga neihah Rev. C. Ronghinga'n a nemnghet ta a. He hna hi 1986 February thla thleng a thawk a, kum 12 chhung a thawk a ni.
A thawh chhunga thil chhinchhiah tlak te -
1. Distric meeting chu Pastor Bial 2-ah then a ni.
2. Kohhran Hmeichhe khawmpui 1978 atangin a hrangin neih a ni.
3. Mission Bangalow SIB-in kum 10 aia rei an luah chu 1981-ah chhuahtir a ni.
4. Pastor pakhat Debendra Nandy (Bengali) nemngheh a ni.
5. 1977-ah Oriental School din a ni.
6. 1986-ah Rowlands memorial School lungphum phum a ni.
7. Cachar ram chhunga In tina chanchin tha bu dah kim vek tura 1977 atanga Synod-in project a siam chu a zo tep tihin 1979 buai avangin thawhzui a ni ta lo. Hemi thawk tur hian mi 10 lak an ni.
1986-1990 chhung Ramthar Board Secretary hna a thawk leh a, 1991-ah Moderator Elect niin Missionary Training Centre-ah Lecturer hna a thawk a, 1992-ah Synod Moderator a ni a, 1993-1994 chhungin Mission Veng Pastor Bial a enkawl a, 1995-ah a Pension ta a ni. A thawh chhungin Nupa tuak 98 a inneihtir a, mi 532 Baptisma a chantir bawk.
A pension kum hian English Congregation Pastor atan ruat a ni leh a, 1996 kum tawp thleng a thawk. Indaih lohna avangin 1995-1997 chhung Missionary Training Centre-ah Lecturer atan rawihzui a ni. A thawh chhungin rawngbawlna peng hrang hrangah mawh a la tam hle a, 1985-ah Assembly aiawhin Council for World Mission (CWM)-ah member a ni a, 1989 khan World Alliance of Reformed Churches (WARC) bul tuma Muslim sakhaw chanchin zirnaah a tel a, Mosolman sakhaw chanchin pawh lehkhabu pathum lai a ziak tawh a ni.
A thawh chhungin heng mawhphurhna hrang hrang hi a chelh tawh -
1. Assembly Executive Committee 1974-1997
2. Assembly Secretary 1987-1990
3. Assembly Moderator 1992-1993
4. Synod Statistician 1988
5. Synod Secretary 1989-1990
6. Synod Moderator 1992
7. Presbytery Moderator 1994-1996
8. Member, Bru Resettlement Committee sawrkar dinah 1988-1989
9. Member, Christian Medical College Council, Vellore 1982
Lehkhabu 9 a ziak tawh a, chungte chu -
1. Thuthlung Thar thuhmahruai
2. Hebrai hrilhfiahna 1994
3. I Chronicles
4. Kan thenawm Muslim te
5. Mosolman sakhua
6. Teherana Christian nih chu
7. Krista sipai huaisen te
8. Sakhaw hrang hrang chanchin
9. Chanchin Tha Johana hrilhfiahna
A hun hnuhnung : Zunthlum leh thisen sang avangin kum 2010 atang khan pawn a chhuak peih vak lova, in lamah a theih ang anga in enkawlin hunpui bikah lo chuan Kohhran inkhawmah pawh a tel peih meuh lova, 2016 Presbytery leh Synod Inkhawmpui kha a inkhawm hnuhnung chu a ni ta deuh mai. August 3, 2017 khan Synod Hospital Durtlang-ah dah luh a ni a, August 9, 2017-ah ICU-ah dah luh a ni a, Doctor leh Nurse-ten theih tawp an chhuah chungin 13.8.2017 zing dar 6:55 khan a chawl ta a ni.
VUINA PROGRAMME
A hun : Ni 13.8.2017, 1:00 PM (Pathianni)
A hmun : Republic Veng Kohhran Biak In
Vuitu : Rev. Lalramliana Pachuau, Ex. Moderator, Mizoram Synod
Hla sak ho : Jordan Lui Kamah Ka Ding A (KHB No. 475)
Chanchin sawi : Rev. Lianhmingthanga Sailo, Synod Secretary
Zaipawl : Republic Veng Kohhran Zaipawl
Thlamuanna Thuchah : Vuitu
Tawngtaisakna : Upa R. Dêngzîkpuia, Secretary (Jr), Mizoram Synod
Hla sak ho : Hla Taka Khaw Dur Leh Ruahpui Sûr (KHB No. 482)
Malsawmna : Rev. H. Remthanga, Finance Officer, Mizoram Synod
Thlanmual : Rev. Zoramsanga, Republic Veng Kohhran