HARHNA THLEN NI 2024
April 05, 2024 | NEWS
April 4, 2024 (Ningani) kha Kohhran Ni pawimawh, Mizorama Harhna thlen ni a nih avangin Kohhran hrang hrangah hman a ni a, Synod Office pawh khar a ni.
Mizorama Harhna lo thlen hmasak hun hi Synod chuan uluk taka a zirchian hnuah, kum 1982 Synod Inkhawmpui chuan April 4, 1906 hi Zorama Harhna lo thlen hmasak ni atan a pawm a, a hman dan tur pawh SEC kutah a dah a. Kum 1984 atangin kum tin April 4 hi Harhna thlen ni tiin Kohhran ni pawimawha chhiar a ni ta a ni. Kum 2006 khan Harhna thlen kum 100-na pawh Kohhran hoten ropui takin kan lo lawm tawh bawk a ni.
Kumin hi Harhna thlen kum 118-na a ni a, Mizoram Presbyterian Kohhran chuan inkhawm tum khat atan programme siamin thupui inang tlang "Harhna chuan ringtu a tichak" Tirhkohte 8:14-17 leh 13:1-3 tlawh chhanin zirho a ni.
