Pu Kapmawia (41), Missionary, Synod Mission Board chu April 13, 2024 dar 10:00 a.m. khan Cancer avangin a boral a, April 14, 2024 chhun dar 12 khan MDTC, Bualpuiah Rev. R. Lalrinsanga, Director,Masihi Sanghati Kendra-in a vui a ni.
Pu Kapmawia vuinaah hian chhungkaw aiawhin Pi Mary Lallawmzuali leh Synod Mission Board atangin Pu B. Lalringliana,Mission Promoter ten thu an sawi a, Upa Vanlalruata Pachuau-in tawngtaisakna hun a hmang a, thlanmualah Rev. Zosangliana Fanai, Bialtu Pastor-in hun a hmang.
Pu Kapmawia chanchin :
Pu Kapmawia hi Pu Khawvelthanga leh Pi Lalkimi te fa pathumna niin 11th December, 1983 khan Bualpui ah a lo piang a, Bualpui a seilian a ni. Pianpui unau mipa pahnih leh hmeichhia pahnih a nei. A pianpui unaute chu:
1) Lalrindika H/o Sangpuii, Durtlang
2) H.Lalpianmawii, Bualpui
3) Kapmawia h/o Mary Lallawmzuali
4) Lalfakawmi (L)
5) James Lalnunmawia, Bualpui
Kapmawia hi naupang a nih lai atanga harh vang leh mite tihlim thei tak a ni a. Primary School leh Middle School hi Bualpui ah zirin High School hi Kawnpui ah a kal thung. Kum 2003 khan Pi Mary Lallawmzuali nen an inneiin fa pathum, Mipa pahnih leh hmeichhia pakhat an nei.
Hetiangin-
1) Malsawmtluanga H/o Catherine Lalnunchami
2) Shalom Lalremmawii
3) Joel Lalruatsanga
Rawngbawlna Lam:
Pu Kapmawia hi Presbyterian Kohhran, Bualpui atanga Missionary-a chhuak a ni a. Kum 2013 khan Voluntary-in Medili, Cachar Tlangramah rawngbawlna, ama thahnemngaihnain kum khat chhung zuk thawkin a awm a. Kum 2014 khan Missionary hna, Synod Mission Board hnuaia thawk atan lak a ni.
SMB hnuaia rawngbawla a awm tawhna hmun te chu:-
(a) Evangelist – Kosopcherra, Cachar Tlangram (2014-2016)
(b) Evangelist – Duttapur, Cachar Tlangram (2017-2021)
(c) Agriculture Worker – MDTC Bualpui (2022-till date)
Pu Kapmawia hi rawngbawltu inpe tak, mi zaidam leh rual pawl thiam tak, a rawngbawlna hmun a mite tawng pawh thiam tak a ni a. Bru tawng thiam tak niin, a rawngbawlnaah pawh a hlawkpui hle thin a ni. Cachar Tlangram tana mi thawhhlawk tak a ni a. Bru tawngin Sunday School zirlai leh Nilai zan thupui zirtur te hi letin a rawngbawlpui te pawn tangkai takin an hmang thin a ni. A thawhna hmun a mite ngainat hlawh tak mi a ni a. Mi inngaitlawm tak leh rawngbawlnaa theihtawpa inpe, thawhpui nuam tak a ni. A rawngbawlnaa theih tawp chhuah mi a nihna hi a entawn tlak hle a ni.
A nat dan leh hun tawp lam:
July, 2021 khan insawisel tanin a chawkawngah bawk a awm tih hmuh chhuah a niin, investigation te tih a ni a. Cancer natna a nei a ni tih hmuhchhuah a ni. Oct 18, 2021 khan Civil Hospital-ah zai niin Chemotherapy leh Radiation therapy te hmanga enkawl a nih hnuah April, 2022 khan a hnungzang ruhah a natna chu a darh a ni tih hmuhchhuah a ni leh a. Theihtawpa enkawl nimahse, a natna hi a taidarh zel avangin kumin kum tir lam khan a nghawngah bawk a lo awm leh a. Radiation Therapy hmanga enkawl nimahse March 28 , 2024 a lo nih chuan in lamah Oxygen te hial pek ngaiin a lo chau zual ta a. Durtlang damdawiinah April 6, 2024-ah admit niin, zan khat Ward ah enkawl a nih hnuin a tuk, April 7, 2024-khan ICU ah dah luh a ni a. Beiseina sang tak nen a dam chhuah leh kan beisei laiin a natna tuar lovin April 13, 2024 dar 10:00 a.m. khan a rawngbawlsak Lalpa hnenah min chawlh san ta a ni.