April 26-28, 2024 chhung khan Mizoram Presbyterian Kohhran bial hrang hrangah Bial Inkhawmpui neih a ni. 

April 26, 2024(Zirtawpni) chhunah Bial hrang hranga Nomination Committee-te an thu khawm a. Kum 2025-a Inkhawmpui puipa turte leh inkhawmpuina hmun tur leh tul dangte an ngaihtuah a ni. 

April 26, 2024 (Zirtawpni) zanah Palai Lawmna & Report Inkhawm neih a ni a, bial chhunga kohhran tin report bakah Bial report khaikhawmna ngaihthlak a ni. April 27, 2024 (Inrinni) nilengin rorel a ni a. Nomination Committee thu bakah, Bial Standing Committee thu te leh bial chhunga kohhran hrang hrang atanga agenda lutte ngaihtuah ho a ni a, mahni bial chhunga bawhzui tur chi leh Presbytery-a kal zel tur eng emaw zat ngaihtuah a ni. Zanah vantlang Pathian biak inkhawm neih zui a ni bawk. April 28, 2024 (Pathianni) chawhma, chawhnu leh zanah te vantlang Pathian biak inkhawm neih a ni a. Chawhnu inkhawmah Lalpa Zanriah Sakramen kil ho a ni a, zan inkhawmah Bial Chairman kal chhuakten Valedictory Sermon an sawi a ni. 

Bial Inkhawmpui hi April thla Pathianni vawi 4-naah neih thin a ni a, chutih rualin eng emaw rokhawlhna avanga hmang hma hret leh hmang tlai hret an awm bawk.

Kum 2023 Synod report-a a lan danin Mizoram Presbyterian Kohhran hnuaiah hian Presbytery 47, Pastor Bial 298, kohhran puitling 1,140 a awm a, kohhran member zawng zawng zat hi 6,28,719 a ni.