Vawiin (April 26, 2024) chawhma lam khan India ram puma Sunday School khaitu ber, All India Sunday School Association (AISSA) Office Bearer-te leh Mizoram Synod hotuten Synod Office-ah inkawm hona an nei.
Mizoram Synod atangin Rev. V. L. Luaia Hranleh, Executive Secretary i/c MSSU leh Rev. Dr. K. Lallawmzuala, Executive Secretary i/c Partnership te an tel a, AISSA atangin Pu Rochamliana, President; Mrs. Dimple Titus Runner, Vice President ; Rev. Dr. T. I. James, General Secretary leh Mr. Angelious Michael, Treasurer te an tel thung a ni.
He hunah hian AISSA General Secretary, Rev. Dr. T. I. James chuan AISSA chungchang leh a hnathawh dan te, a hmalak tawhna leh a hmalak mekna te a sawi fiah a. Mizoram Synod leh AISSA-in thawh hona tha tak an neih zui zel theih dan tur te zau tak leh inpawh tlang taka sawi ho a ni.
AISSA hotute hian Mizoram Synod Senior Executive Secretary Rev. C. Zorammawia chu a pisaah an hmu bawk a. Chawhnu lamah AISSA OB-te hian NCCI hotu hlui leh AISSA President leh General Secretary lo ni tawh, Rev. K. Lungmuana hovin thut khawmna an nei zui bawk a. April 27, 2024 (Inrinni)-ah nilengin AISSA Office Bearer-te hi thil pawimawh hrang hrang ngaihtuahin an thu khawm zui dawn a. AISSA OB-te hi India ram hmun hrang hrangah an thu khawm thin a ni.
AISSA hotute hi Inrinni zanah Khatla Kohhran Biak Inah an inkhawm ang a, Pathianni zingah Tuikhuahtlang Kohhran Sunday School leh Mission Veng Kohhran Sunday School an tlawh ang a, chawhnuah Chanmari Kohhran Biak Inah an inkhawm ang a, zanah Zarkawt Kohhran Biak Inah an inkhawm dawn a ni.
AISSA hi India rama Kristian pawl lian berte zinga mi a ni a, National Council of Churches in India (NCCI) uapna hnuaiah awmin NCCI Related Agency a ni a. NCCI-a tel kohhran leh Kristian pawl hrang hrangte chu AISSA-ah hian member an ni a, Nagpur-a NCCI Campus-ah office an nei a, India rama Sunday School rawngbawlna chungchangah kawng hrang hrangin hma an la thin.