May 1-5, 2024 chhung khan kum khat dana neih thin, Presbyterian Church of India General Assembly vawi 45-na chu Chaltlang Kohhranah neih a ni.
Inkhawmpui thupui chu ‘I ram lo thleng rawh se’ (Matt 6:10) tih a ni. India ram Presbyterian Kohhran rorelna sang ber, General Assembly hi Mizoram Synod-in vawi sawm a thlenna a ni a, Mission Veng Kohhranah vawi nga, Dawrpui Kohhranah vawi hnih, Kolasib Diakkawn leh Champhai Vengsang Kohhranah vawi khat ve ve inkhawmpui hi nghah a lo ni tawh a ni.
May 2 (Ningani) zanah Inkhawmpui tanna inkhawm a awm a. Inlawmna thuchah Rev. B.B. Lamin, Moderator kal chhuak turin a sawi a, zaipawl pathum an zai a ni. Zirtawpni leh Inrinniah Inkhawmpui rorel neih a ni a, hetah hian thu pawimawh tak tak ngaihtuah a ni a, rorel hi Moderator thar, Rev. Joshua Jeme-in a kaihruai a ni. Zirtawpni zanah Rev. K.S. Rynghang-in Pathian thu a sawi a, zaipawl pathum an zai a. Inrinni zanah Rev. Rolianthanga Lalsim-in Pathian thu a sawi thung a, zaipawl pathum an zai a. Zirtawpni leh Inrinni zingkarah Rev. B.J. Syiemlieh hovin Bible Study neih a ni a, Pathianni zingkarah Rev. B.B. Lamin-an Lalpa Zanriah Sakramen a buatsaih bawk a ni.
Pathianni chawhma, chawhnu leh zanah Vantlang Pathian Biak inkhawm a awm a. Chawhma inkhawmah Rev. S.S. Majaw hnen atangin Pathian thuchah ngaihthlak a ni a, chawhnu inkhawmah Rev. Albert Teron-an Pathian thuchah a sawi thung a, zan inkhawmah Moderator kal chhuak, Rev. B.B. Lamin-an Valedictory sermon a sawi a ni. Pathianni hian inkhawm apiangin zaipawl pali zel an zai a ni. Mizoram Synod Choir leh Bial Zaipawlte bakah KJP Synod Mihngi Zaipawl, KJP Synod Sepngi Zaipawl leh KJP Pdeng Zaipawl te zaiin palaite beng a fah hle a. A tawp zanah thlengtu Kohhran Zaipawlpui ngaihnawm takin an zai bawk a ni.
Kum 2022-2024 PCI inchhiarna tlangpui chu hetiang hi a ni.
Synod awm zat : 10
Provisional Synod zat : 2
Presbytery awm zat : 137
Pastor Bial awm zat : 669
Kohhran puitling zat : 3508
Branch church zat : 546
Minister zat : 1286
Pro. Pastor zat : 122
Kohhran Upa zat : 13473
Danzawhkim zat : 985564
Mipa zat : 774876
Hmeichhe zat : 830547
Member zawng zawng : 1605423
Ringthar neih zat : 37543
Kum 2026 hian PCI Biennial General Assembly vawi 46-na chu April 29-May 3, 2026 chhungin Phudmuri Presbyterian Church, KJP Synod Sepngi-ah neih a ni ang a, inkhawmpui thupui tur chu, ‘To God be the Glory’ (Philippians 4:20) tih a ni ang.
PCI General Assembly puipa tharte -
Moderator : Rev. Joshua Jeme
Moderator Elect : Rev. H.L Myrsing
Secretary Senior : Rev. J.R Thabah
Secretary Junior : Rev. Lalsangloma
Treasurer : Rev. E.R .Kharkrang
Statistician : Rev. Dr. P.R. Hmuaka
For more Pics Click Here