May 7, 2024 (Thawhlehni) chawhma dar 10:00-ah Synod Hospital Board an thu khawm a. Board thut khawm vawi 147-na hi Rev. R. Vanlalnghaka, Synod Moderator-in a kaihruai a, hming lam a nih hnuah Dr. Lalthakima, Board Secretary-in report a pe zui a ni.
Report-ah hian Dr. R.L. Sanghlunan Medical Superintendent hna a zawm thu te, Synod Hospital Chawlbuk hawn a nih thu te, Healing Ministry Week hman a nih thu te, Central Kohhran Hmeichhia atanga Synod Hospital tan Rs. 10,79,316 leh John Williams Hospital tan Rs. 4,00,000 dawn a nih thu te, sawrkar kum kal ta chhunga Charity Fund atanga damlo awm man pe thei lo mi 863-te tana Rs. 2,18,04,753 peksak a nih thu ngaihthlak a ni.
Tun tum Hospital Board thut khawmah hian thu ngaihtuah tur eng emaw zat chhawp chhuah a ni a. Nursing College Recruitment Rules leh Hospital Manual en that rawtna te, MRI dahna buatsaih leh a lei dan tur chungchang te bakah thawktute kai san dilpuina te, post ruak hnawh khah dilna te, post thar siam dilna te leh tul dangte ngaihtuah a ni bawk a ni.
Kum 2024 April thla chhung khan Synod Hospital-ah hian mi 1049 admit an ni a, nau piang 128 awmin mitthi hi 25 an awm thung a ni. Hospital OPD leh Dr. Fraser's Clinic-a inentir hi an vaiin mi 6292 an ni bawk. John Williams Hospital-ah hian 2024 January-April chhungin OPD-ah mi 1969 an inentir a, damlo 357 an in-admit a, nau dama piang 72 awmin mitthi 2 an awm a ni.
Synod Hospital Board thut khawm vawi 147-naah hian member 42 an kal thei a ni.